ខ្សែប្រយុទ្ធ Harry Kane បានចេញមកការពារមិត្តរួមក្រុមទាំង៣គឺ Rashford, Sancho និង Saka បន្ទាប់ពីពួកគេទាត់បាល់ប៉េណាល់ទីកាត់សេចក្ដីមិនចូលទល់នឹងអ៊ីតាលីយប់មិញ
កីឡាកររបស់ក្លឹប Spurs រូបនេះជឿជាក់ ក្រុមនឹងប្រើការខកចិត្តលើកនេះដើម្បីជំរុញទឹកចិត្តរបស់ខ្លួនបន្ថែមនៅព្រឹត្តិការណ៍ World Cup ឆ្នាំក្រោយដែលរៀបចំនៅប្រទេសកាតា។ យ៉ាងណា ប្រធានក្រុមរបស់អង់គ្លេសខាងលើកឡើងថា ការចាញ់អ៊ីតាលីប្រហែលជារឿងឈឺចាប់ពេញមួយអាជីពសម្រាប់កីឡាករអង់គ្លេស។
ក្នុងកិច្ចសម្ភាសន៍ជាមួយ BBC កីឡាករវ័យ២៧ឆ្នាំបាននិយាយថា ប៉េណាល់ទីគឺជាអារម្មណ៍អាក្រក់បំផុតក្នុងលោក ពេលដែលចាញ់។ ប៉ុន្តែគួរតែមានមោទកភាពសម្រាប់ការឈានដល់កម្រិតនេះក្នុង Euro។ អ៊ីតាលីជាក្រុមល្អណាស់។ ប្រហែលជាអង់គ្លេសចុះការពារខ្លាំងពេក ទើបធ្វើឲ្យអ៊ីតាលីមានបាល់លេងច្រើន។
Kane ក៏បាននិយាយពីមិត្តរួមក្រុមដែរថា ប៉េណាល់ទីជាបាល់៥០/៥០។ វាមិនមែនជារាត្រីរបស់អង់គ្លេសឡើយ គ្រប់គ្នាសុទ្ធតែអាចខកខានឱកាសទាត់ចូល។ គេសង្ឃឹមកីឡាករទាំងអស់ពង្រឹងបន្ថែមអំពីបរាជ័យនេះ ដើម្បីជាទុនជំរុញចិត្តលេង World Cup ឆ្នាំក្រោយ៕
