ក្លឹប Aston Villa បានឈានដល់កិច្ចព្រមព្រៀងជាមួយភ្នាក់ងារ Jack Grealish ដើម្បីឱ្យរូបគេចាកចេញនៅក្រោយចប់ព្រឹត្ដិការណ៍ Euro 2020 នេះហើយ
ដំណឹងនៃការយល់ព្រមឱ្យចាកចេញនេះ បានធ្វើឱ្យក្រុម Manchester City មានសង្ឃឹមច្រើនហើយ។ ក្រុមដឹកនាំដោយលោក Pep បានព្យាយាមចង់បានកីឡាករអង់គ្លេសខាងលើយូរមកហើយដែរ ប៉ុន្តែក្រុម Aston Villa មិនព្រមលក់សោះ។ ខណៈដែលពេលនេះ ពួកគេបានយល់ព្រមហើយ នោះឱកាសយកកីឡាករកំពុងឡើងជើងនៅអង់គ្លេសនេះកាន់តែសង្ឃឹមច្រើនសម្រាប់ក្រុម Man City ។
ប្រភពនៅអង់គ្លេស បានបញ្ជាក់ថាម្ចាស់ជើងឯក Premier League រដូវកាលមុនខាងលើ នឹងដាក់តម្លៃ១០០លានផោនដើម្បីយក Grealish តែម្ដង។ ដោយតម្លៃនេះ គឺសមល្មមសម្រាប់ក្រុម Aston Villa ទទួលយកតែម្ដង។ កីឡាករវ័យ២៥ឆ្នាំ កំពុងលេងឱ្យជម្រើសជាតិអង់គ្លេស នៅព្រឹត្តិការណ៍ Euro ហើយរូបគេក៏ទទួលបានការចាប់អារម្មណ៍ច្រើនផងដែរក្នុងការលេងទល់ក្រុមឆែកកន្លងទៅ៕
